,،
مساء الخير 
كيفكم؟ إن شاء الله طيبين؟ 
و كيف الدوامات معاكم؟
بالنسبه ليا اليوم برضو هدوء بس اعتقد الوضع ما راح يستمر
زي ما يقولو دا الهدوء اللي يسبق العاصفه 
الناس بتجهز لاختباراتها و احنا نجهز لهم لسفرهم
احس ابي اخذ اجازه.. بس حيكون هاي سيزون و ما راح يمديني اخذ اجازه
كمان اصلا افكر اخذها في رمضان 
طبعاً طفشانه و كونت العب في جوالي حبيب البي و انا جالسه اتفرج عالصور
قلت ليش ما انزلها هنا.. طبعا الجوده جوده كاميرا جوال..
المفروض تكون احسن من كدا خصوصا انو 12 ميغا بكسل
الموهم دي حقت "طلعتي" مع صحبتي و اهلها لدرة العروس
العاده اني اروح كل نهايه اسبوع انام عندها.. هذه المره قالو نطلع الدره
قلنا يلا قدام.. الموهم أستأذنت من ماما و طلعت معاهم.. طبعا الطلعه ما شاء الله كانت روعه
و الجو عالصباح يجنن..
و دي صور .. طبعا مو كلها.. لانو الباقي فيها اشخاص
دي الصوره اول ما وصلنا واستقرينا.. اعتقد عالساعه 2 الفجر
المنظر من البلكونه
دا المكان اللي اغلب الوقت كنا جالسين فيه
دا بعد الفجر اول ما بدأ يطلع الصبح
المنظر كان جداً روعه و يجنن و الهوا كان مرااا واو
طبعاً بعد كدا قلنا ننزل البحر.. بس الرجال كانو صاحيين و يلعبو بلايستيشن
و قالو لحد ينزل في شباب تحت
و احنا طقت معانا و نبغا ننزل البحر 
الا اكتشفنا انو قدام الشاليه من الباب الرئيسي في بحر
قلنا خلونا نروح نكتشف 
و رحنا و كان المكان جدا فاضي ولا حتى مخلوق فيه
و الجوا كل ماله بيحلو.. عاد تحمسنا و جلسنا نلعب و نستكشف 
أسمي عالرمله خخخخخخخخخ
يا حوبينيلي بس
بعد كدا بدأت الشمس تطلع
وقتها خلاص نزلنا المويه .. بس القهر 
انو انا الوحيده اللي ما اخدت لون.. جلسو يتريقو عليا
انا انا سرت بيضا بزياده 
,،
